На 7 октомври ќе се одржи Втората конференција „НАУКА ЗА ДЕЦА“

Во организација на Фондацијата „КАНТАРОТ“, под мотото „Пуштете ја вашата научна фантазија“, во сабота, на 7 октомври, ќе се одржи втората научна конференција „НАУКА ЗА ДЕЦА“. Конференцијата ќе се одржи во Меѓународното училиште НОВА, а нејзината цел е популаризација на науката кај најмладите.

Главниот дел од програмата на конференцијата се предавања и работилници организирани од проф. д-р Никола Стиков (Универзитет на Монтреал во Канада) и д-р Тања Павлеска (Институт Јожеф Стефан во Словенија). Преку нив децата на интересен начин ќе се запознаат со многу научни концепти, при што оваа година акцентот е на оптичките илузии и на законите на веројатноста. Работилниците се интерактивни, а љубопитните деца ќе можат да добијат одговори на своите прашања директно од научниците.

На конференцијата ќе се додели и првата НЗД награда за извонреден научен потенцијал „Иван Ќостаров“, донација од проф. д-р Венка Симовска (професорка на Универзитетот Архус во Данска). Исто така, ќе се објават победниците на конкурсот Научна фантазија за цртеж и дигитална уметност. За крај, ќе се доделат признанија на наставниците кои најмногу помогнаа со промоција на НЗД во училиштата.

ПРОГРАМА НА КОНФЕРЕНЦИЈАТА

РЕГИСТРАЦИЈАТА Е ЗАТВОРЕНА ЗАТОА ШТО ГО НАДМИНАВМЕ КАПАЦИТЕТОТ

ДОКОЛКУ САКАТЕ ДА СЕ СТАВИТЕ НА ЛИСТАTA НА ЧЕКАЊЕ, ВЕ МОЛИМЕ ПИШЕТЕ НИ НА: INFO@KANTAROT.MK

АКО НЕКОЈ ОТКАЖЕ, ЌЕ ВЕ КОНТАКТИРАМЕ ЗА ДА СЕ РЕГИСТРИРАТЕ

09:30 - 09:45	Прием на регистрираните деца
09:55 - 10:00	Обраќање и почеток на конференцијата м-р Драгана Стикова, директорка на Фондација „КАНТАРОТ“
10:00 - 12:00	Интерактивни предавања 1. Џам-илузиии: како мозокот ве лаже проф. д-р Никола Стиков и м-р Драгана Стикова Оптичките илузии ни покажуваат дека не треба секогаш да им веруваме на сопствените очи. Децата ќе имаат можност самите да создадат, истражат и разберат една вртоглава илузија. 2. Пишман или инает: неверојатна наградна игра д-р Тања Павлеска и Дафинка Срезоска Веројатноста понекогаш не ја разбираат дури ни возрасните. Низ интерактивна апликација децата ќе научат како да ја употребат веројатноста за да донесат одлука.
12:00	Изложба „Научна фантазија“ Финалистите од нашиот ликовен конкурс ќе имаат можност да ни ги раскажат своите научни фантазии преку нивните креации
12:30	Доделување на награди - Прогласување на победници од ликовниот конкурс „Научна фантазија“ - Доделување на признанија на НЗД наставници - Награда за извонреден научен потенцијал „Иван Ќостаров“
13:00	Затворање на конференцијата со мини закуска

Вашето дете можете да го пријавите со пополнување на формуларот на линков: https://bit.ly/3tcuSVp.

За учеството на децата не се плаќа, но доброволните донации се добредојдени. Доколку сте во можност, донирајте на жиро сметката на Фондација „КАНТАРОТ“: 250-0010051639-69 (Шпаркасе банка).